《英國租樓程序》 | MiExpert | All-in-one Online Immigration Platform

喺英國啲租盤通常出嚟大概一至兩個禮拜就會畀人租咗,所以我建議你喺起飛前一個禮拜先上網搵新租盤,跟住 email 預約時間,到步嗰個星期就可以直接去睇樓,如果睇唔啱你可以陸續再喺網上面搵啲新 add 出嚟嘅租盤,因為有啲太舊嘅 post 或者係已有幾百 view 嗰啲, 一般都應該會租咗出去。 睇樓當日如果真係鍾意,睇完樓就即刻打電話去畀 agent 同佢講你想申請租呢層樓, 咁 agent 就會叫你填一張 application form ,裏面要填晒你嘅資料包括收入職業等等。 如果你係英國冇工作嘅話通常有兩種情況,一種係一次過交6個月租加一個月按金,咁樣業主可有願意租畀你,但我聽講有啲業主都幾大咬,會要求香港人一次過畀一年甚至兩年租金,其實呢一樣嘢佢係犯法㗎,如果唔想畀業主押咁耐俾六個月就 ok。 另外一種係六個月租金加一個月按金再加擔保人, 呢個擔保人需要係持有英國身份兼且有份正當職業及收入,但一般會好難搵到,因為做得擔保人就係你有啲咩依喐佢要承擔所有嘅責任同損失。 第三種就係你有工作,咁就睇下有冇英國公司請你或可以假扮聘請你, 等agent發郵件去審查嘅時候幫你做假口供或者假僱傭合約, 如果順利過關你唔需要擔保人亦唔需要一次過交6個月,就係正常嘅一個月租金一個月按金就得啦。 當你嘅申請批咗落嚟之後 agent 就會要求你畀一個星期嘅 on hold fee ,即係話佢會將呢個租盤 lock咗喺度唔畀其他人租或睇樓,之後佢就會開始審查你嘅信用 credit,就係我之前講嘅你有冇工作,你一年收入係幾多,如果你嘅 target 係£700租一個月,你大概就需要有二萬三左右嘅收入(稅前), 另外啲問題就係例如你有冇攞緊政府福利,例如你有冇不良信貸,例如你有冇其他貸款或者爭人錢....等 審查通過咗就會開始做合約, 呢個階段agent會問你有冇其他要求例如添加雪櫃洗衣機或者其他.... 一般如果要另外加雪櫃洗衣機可能租金會再加錢,但一般業主都唔會幫租客買,因為可能下一手租客自己有,業主仲要嘥錢拆同搬走唔化算 。另外再做合約之前將會要求收到六個月租加一個月按金(無職業)或者一個月按金加一個月租金(有職業), 收到錢後就會安排佢哋公司啲人去 final check ,將所有 damage 同埋影曬成間屋嘅相當做附件放喺租約裏面,所以即係話如果你租咗層樓住咗半年之後你畫花咗人哋度牆或者釘咗兩口釘或者整壞屋內嘅嘢,agent 就會根據呢啲相可以向你做索取賠償扣按金。 當 agent 做好合約就會同你約時間簽約攞鎖匙~跟住就恭喜你啦 🎉🎉🎉入得伙! 要留意嘅係攞到鎖匙後第一件事入到屋企要對照番佢影落嚟嘅相是否相同,另外要細心檢查有冇其他漏嘅嘢,例如發霉嘅天花,牆邊地氈翹起,讀門花咗或者牆上有兩口釘.....等,只要相裏面冇而你喺屋裏面見到有嘅都要即時影低跟住當日發電郵附相片給 agent, 並留檔案以確保到時退租畀返樓嘅時候你有證據證明呢啲相同 damage 係當日你攞鎖匙嘅時候已經有,唔係你住落先有。 喺英國續租樓係唔可以改動裏面嘅間隔,就算你要打一口釘掛畫或者加插蘇都要電郵畀 agent ,等 agent 問咗業主答覆同意你先可以做,並且要將啲電郵嘅紀錄存檔以便日後冇爭拗。