英國一般買二手車由幾百鎊甚至到過萬都有，視乎唔同嘅車種，牌子，哩數同埋年份歐洲車會貴少少但係零件平，日本車會平但係零件貴，自動波又會貴過棍波， 上半年出嘅車架同下半年出嘅車架都會有唔同， 哩程數就更加唔洗講， 睇到架車已經揸到幾殘
英國有個網站可以查到架車有冇曾經撞過，我霎時間唔記得係邊個網站，等我摷一摷再鋪返上嚟話畀你哋知。
私人出售 1 : 有時你會見到街邊洦啲車上面寫咗價錢牌，通常一般係私人出售，當然你要證明嗰架車嘅車主係佢，第二你要查下呢架車有冇撞過，第三如果你有車行師傅能夠幫你 check 車再買咁就最安全啦！(幾百至過千)
私人出售2: 我曾經喺 ebay 度 bit 個架車 300 鎊，買咗返嚟換咗四條呔用咗 500 鎊， 重點係你懂唔懂車，如果唔係都係要搵過車行師傅同你一齊去睇同埋試先好俾錢。(幾百至過千)
廢車廠: 有時你會見到廢車廠門口或者街邊會泊啲黐咗價錢牌嘅車出售，呢啲車通常 就係 有啲人架車有問題攞咗去整車，但因為整車嘅價錢太貴佢寧願唔要架車， 咁呢啲廢車廠老闆就會去整車嗰啲舖頭拉返嚟拆件再賣，如果車況唔錯，佢就會擺喺街邊再賣， 但佢講到明架車有問題，你需要去整，佢唔會幫你整，等到冇人要先會再拆件， 呢啲車一般會賣得好平，如果你識車行師傅帶埋佢一齊去睇，一般 只需要車價嘅三分一就可以 修理得好， 咁就抵玩。(幾百至過千)
Dealer : 呢種車行嘅二手車一般有保障，架車亦都係賣出前已經保養或者修理好， 所以你只需要睇啱鍾意嘅款，年份，哩數啱就可以分期或者現金買，但車價一般都要三千鎊以上，好少會有低過 £3000 嘅車。( 幾千鎊至過萬鎊)
品牌代理商: 一般搵品牌代理商都會係想買新車，但有啲代理商亦會出售啲 好新淨嘅二手車，大概係新車價嘅八折左右， 如果想分期貸款就要出示收入證明，佢哋會經過信貸機構審查你嘅信用情況， 審查通過 之後就會上會每月供款。
買車除咗要留意有冇曾經撞損過之外嘅係原廠保養期， 例如新車 benz 原廠保養期係五年，你買個架二手 benz 前車主只揸咗兩年，咁你接手後就只會淨返 3 年原廠保養。
原廠保養有乜嘢好壞處: 原廠保養期內每年到咗一定哩數佢會通知你揸返原廠做保養唔使另外收費，但過咗保養期後例如 benz 車佢會收 6 至 900 鎊去幫你做保養一次， 或者你可以選擇買多一個 3 或 5 年保養期，都要近二千幾鎊以上，呢樣嘢就要睇下揸嘅人錫唔錫車。